MKUU WA MKOA AENDELEA NA ZIARA YA KUSIKILIZA KERO NA KUTATUA KATIKA MJI WA MAKAMBAKO

Posted on: December 18th, 2023

Mkuu wa Mkoa wa Njombe, Mhe. Anthony Mtaka  amefanya mkutano uliotambuliwa kwa kauli mbiu isemayo FUNGA MWAKA BILA KERO katika Halmashauri ya Mji wa Makambako ambapo hapo amesikiliza kero kutoka kwa wananchi wa Makambako na maeneo mengine ya jirani.Akiwa katika viwanja vya Stendi ya zamani ya mabasi ya Makambako, amewaasa watumishi wa serikali kuacha tabia ya kufanya kazi kwa mazoea badala yake watambue kuwa wao wanawajibu wa kuwatumikia na kuwahudumia wananchi kwa nafasi zao.

Mhe. Anthony Mtaka amewaeleza wajasiriamali waliokuwa wakichukizwa na baadhi ya watumishi kwenye maeneo hayo kwa kuwazuia kufanya biashara zao sasa wanapaswa kuendelea kufanya biashara zao bila kubughudhiwa na mtu yeyote na badala yake waruhusiwe kufanya biashara zao  masaa 24 na  kuzingatia sheria za nchi.

Aidha, katika kuelekea mwaka  mpya wa masomo 2024/2025 amewataka wazazi na walezi kuwaandikisha elimu ya awali watoto wote wenye umri unaotakiwa  kuanza kusoma na amesisitiza kuwa, kila mtoto aliyepangiwa kuanza kidato cha kwanza ndani ya Mkoa wa Njombe ifikapo Januari 2024 anapaswa  kuanza mosomo yake bila kisingizio chochote cha kushindwa kumpeleka mtoto shule.

Sambamba na hayo Mh  Mtaka  amewahakikishia wananchi kuwa, serikali ya awamu ya sita chini ya Rais Daktari Samia Suluhu Hassan inaendelea kutekeleza ilani ya chama cha mapinduzi kwa kuendelea kutenga fedha nyingi za maendeleo katika maeneo mbalimbali ya Mji wa Makambako hivyo hawana budi kuiunga mkono serikali.