Maporomoko ya Mto Ruhuji mjini Njombe huonekana mithili ya theluji, uang’avu wake ukipenya kwenye msitu unaoyafunika, upande wa Mashariki unapopita kwenye barabara inayoingia mjini hapo ukitokea Makambako.
Maji ya Mto Ruhuji yanavutia ajabu, hupita juu ya mwamba mkubwa na kuporomoka kuelekea chini ya mwamba huo, takribani mita 50 kwenda chini, yakitua juu ya miamba mingine iliyopo hapo, na kutengeneza taswira mithili ya mvuke pamoja na sauti za kishindo cha maji, yenye kulingana na kile cha dhoruba.
Unaposikiliza sauti za maporomoko hayo, ni burudani murua kumliwaza mwanadamu au kiumbe hai chochote.
Pamoja na burudani ya maporomoko, eneo hilo limezungukwa na msitu, ni eneo lenye mazingira ya ukijani kipindi chote cha mwaka, na mandhari yake ni kivutio kizuri kwa wafanya biashara za picha, watu wengi hupenda kupiga picha wawapo eneo hilo.
