Kamishna Msaidizi Idara ya Kazi Atua Njombe kwa Ziara ya Kazi.

Posted on: November 21st, 2024

Kamishna Msaidizi wa Idara ya Kazi kutoka Ofisi ya Waziri Mkuu – Kazi, Vijana, Ajira na Wenye Ulemavu, Andrew Mwaluisi, akiambatana na maafisa wengine, wametembelea Ofisi ya Mkuu wa Mkoa wa Njombe leo, tarehe 21 Novemba 2024.Wamekuja Njombe kwa  Ziara ya siku mbili  kwa lengo la kutoa elimu kwa waajiri juu ya uzingatiaji wa sheria za kazi, ushauri wa kuimarisha masuala ya ajira, na kuhakikisha haki za wafanyakazi zinalindwa.

Akizungumza wakati wa mapokezi yao, Mkuu wa Mkoa wa Njombe, Mhe. Anthony Mtaka, aliwakaribisha na kusisitiza umuhimu wa ziara hiyo katika kuboresha mahusiano kazini. "Nawakaribisha sana hapa Njombe. Elimu mnayotoa ni ya muhimu sana kwa waajiri na wafanyakazi. Tunataka kuona mazingira ya kazi yanayozingatia sheria, haki za wafanyakazi zikiheshimiwa, na waajiri wakiongeza ufanisi katika shughuli zao," alisema Mhe. Mtaka.

Aidha, maafisa hao walieleza kuwa lengo kuu ni kupunguza malalamiko yanayotokana na ukiukwaji wa sheria za kazi. Pia walihimiza waajiri kuongeza tija kazini kwa kuzingatia kanuni za usimamizi bora, hali itakayosaidia kuboresha huduma kwa jamii na uchumi wa taifa kwa ujumla.