HERI YA EID EL-FITR.

Posted on: March 30th, 2025

Ofisi ya Mkuu wa Mkoa wa Njombe inawapongeza Waislamu wote kwa kukamilisha ibada ya mwezi mtukufu wa Ramadhani na kusherehekea Sikukuu ya Eid El-Fitr. Tunawatakia heri, amani, na baraka tele katika siku hii adhimu.

Katika kipindi hiki cha sikukuu, tunatoa rai kwa wananchi wote wa Mkoa wa Njombe kuendeleza mshikamano, upendo, na maadili mema kwa ajili ya ustawi wa jamii. Ni muhimu kuendeleza mambo mema tuliyoyaishi wakati wa mfungo, ikiwa ni pamoja na kusaidiana, kushirikiana, na kuishi kwa uadilifu.

Mkuu wa Mkoa wa Njombe, Mhe. Anthony Mtaka, anasisitiza umuhimu wa kuendeleza maadili na mshikamano katika jamii hata baada ya mfungo. Akizungumza kuhusu umuhimu wa kudumisha tabia njema, amesema:

"Tusichukulie matendo mema tuliyofanya wakati wa Ramadhani kama ya msimu, bali yawe sehemu ya maisha yetu ya kila siku. Umoja, upendo, na kusaidiana ndiyo misingi ya jamii yenye maendeleo na amani."

Tunamshukuru Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa jitihada zake katika kuimarisha maendeleo ya Taifa letu na kuhakikisha wananchi wanapata fursa ya kusherehekea sikukuu hizi kwa amani na utulivu.

Kwa mara nyingine, tunawatakia Waislamu wote Eid Mubarak yenye furaha na baraka tele, huku tukiwatakia Watanzania wote amani na mafanikio mema. Mungu aendelee kulibariki Taifa letu.

Eid Mubarak!