VIJANA BALEHE WAJENGEWA UWEZO KUHUSU VVU NA UKIMWI MKOANI NJOMBE.

Posted on: January 28th, 2025

Mkuu wa Wilaya ya Wanging'ombe, Mhe. Zakaria Mwansansu, akimwakilisha Mkuu wa Mkoa wa Njombe, Mhe. Anthony Mtaka, amekuwa mgeni rasmi katika Kongamano la Kujenga Uelewa wa Masuala ya VVU na UKIMWI kwa Vijana Balehe wa Shule za Msingi na Sekondari Mkoa wa Njombe.Kongamano hilo limewakutanisha wanafunzi kutoka Halmashauri ya Mji Njombe, Makambako, Wanging'ombe, pamoja na Halmashauri ya Wilaya ya Njombe.

Viongozi mbalimbali wa serikali walihudhuria, wakiwemo Mratibu kutoka Ofisi ya Waziri Mkuu Sera,Bunge na uratibu Bi. Adella Mpina ambaye ni Mratibu wa Masuala Ukimwi, watumishi kutoka Ofisi ya Mkuu wa Mkoa wa Njombe wakiongozwa na Katibu Tawala wa Mkoa, Bi. Judica Omari, Kaimu Mkurugenzi Mtendaji kutoka TACAIDS Bi. Catherine Joachim pamoja na Katibu Mwenezi wa Chama cha Mapinduzi Mkoa wa Njombe, Ndg. Josaya Luoga.

Katika hotuba yake, Mhe. Zakaria Mwansansu aliipongeza serikali kwa juhudi zake za kufikia makundi yote ya rika balehe na aliwaasa wanafunzi na vijana kuwa makini katika kipindi cha makuzi ili kuepuka maambukizi mapya ya VVU na mimba za utotoni.

Alisema, "Vijana, tambueni kuwa maisha yenu ni dhamana kubwa. Epukeni vishawishi vinavyoweza kuhatarisha afya na mustakabali wenu. Jilindeni na maambukizi ya VVU kwa kuepuka ngono zembe na kujiepusha na tabia hatarishi."

Katika moja ya hotuba zake kuhusu mapambano dhidi ya UKIMWI, Waziri Mkuu, Mhe. Kassim Majaliwa, aliwahi kusema, "Takwimu za maambukizi mapya ya VVU zinaonesha kwamba asilimia 40 ya maambukizi mapya yanatokea kwa vijana wenye umri wa miaka 15 hadi 24. Hii inaonesha umuhimu wa kuwalinda vijana wetu dhidi ya maambukizi haya."

Katika Mbio za Mwenge wa Uhuru za mwaka 2024, moja ya jumbe za kudumu kwenye kipengele cha Ukimwi ilikuwa "Jamii iongoze kutokomeza UKIMWI," ikisisitiza ushiriki wa jamii katika mapambano dhidi ya ugonjwa huo.