TANZANIA YAJIPANGA KISASA KUELEKEA UCHAGUZI MKUU 2025: WATENDAJI WA UCHAGUZI WAAPA UTIIFU NA KUHESHIMU MAADILI YA KAZI.

Posted on: July 15th, 2025

Njombe, Tanzania – Julai 15, 2025 — Watendaji wa Uchaguzi ngazi ya Jimbo kutoka Mikoa ya Njombe, Ruvuma na Iringa wamekula kiapo cha utiifu wa maadili ya kazi mbele ya Hakimu Mkazi wa Mkoa wa Njombe, Mhe. Liad Chamshana, ikiwa ni sehemu ya maandalizi rasmi kuelekea Uchaguzi Mkuu wa mwaka 2025. Kiapo hicho kimehusisha ahadi ya kujitoa uanachama wa chama chochote cha siasa pamoja na kutunza siri za kiutumishi kwa mujibu wa sheria na miongozo ya Tume Huru ya Taifa ya Uchaguzi.

Hafla hiyo ni sehemu ya mafunzo ya kitaifa yanayoratibiwa na Tume Huru ya Taifa ya Uchaguzi (NEC), yanayofanyika katika Kituo cha Njombe Mjini kuanzia Julai 15 hadi 17, 2025. Lengo kuu ni kuwaandaa Watendaji wa Uchaguzi kutoka ngazi ya Mkoa na Jimbo kwa kuwajengea uwezo wa kitaaluma katika kusimamia na kutekeleza majukumu yao kwa uadilifu, ufanisi, na kwa kuzingatia viwango vya kimataifa vya uchaguzi huru na wa haki.

Katika mafunzo hayo, washiriki wataelimishwa kuhusu majukumu yao ya kisheria, hatua mbalimbali za mchakato wa uchaguzi, na utekelezaji wa ratiba ya uchaguzi itakayotolewa na NEC. Aidha, elimu hiyo inalenga kuhakikisha uwazi, uwajibikaji na kuimarisha imani ya umma katika mifumo ya uchaguzi nchini.

Tume imesisitiza dhamira yake ya kuhakikisha ushiriki mpana wa wananchi katika uchaguzi mkuu ujao, huku ikikumbusha kaulimbiu rasmi ya uchaguzi wa mwaka 2025 isemayo: “Kura Yako Haki Yako, Jitokeze Kupiga Kura.” Kaulimbiu hiyo ni wito kwa Watanzania wote kutumia haki yao ya msingi ya kupiga kura kama chombo cha kuleta mabadiliko na maendeleo ya kidemokrasia.