Rais wa Jamhuri ya Muungano wa Tanzania, Mhe. Samia Suluhu Hassan, amewasili mkoani Ruvuma leo, Septemba 23, 2024, kuanza ziara ya kikazi itakayodumu hadi Septemba 28, 2024.

Posted on: September 24th, 2024

Katika ziara hii, Mhe. Rais ameanza kwa kufunga Tamasha la Tatu la Taifa la Utamaduni lililofanyika mjini Songea kabla ya kuanza rasmi ziara ya kutembelea na kuzindua miradi mbalimbali ya maendeleo mkoani Ruvuma kuanzia 24 Septemba 24.

Viongozi mbalimbali kutoka mikoa ya jirani, wakiwemo kutoka Mkoa wa Njombe, kama Mkuu wa Mkoa wa Njombe, Mhe. Anthony Mtaka, aliyewakilishwa na Mkuu wa Wilaya ya Njombe, Mhe. Kissa Gwakisa, na Katibu Tawala wa Mkoa wa Njombe, Bi. Judica Omari, walihudhuria sherehe za kufungwa kwa tamasha hilo la utamaduni.

Mhe. Rais anatarajiwa kutembelea wilaya tano za Mkoa wa Ruvuma, ambako ataongoza mikutano ya hadhara, kuzindua, na kuweka mawe ya msingi kwenye miradi muhimu ya maendeleo. Pia, atahitimisha ziara yake kwa kufunga mkutano wa Umoja wa Wanawake wa CCM tarehe 28, ambapo atatoa hotuba kwa wananchi katika uwanja wa Maji Maji, Songea.