DKT. JUMA MFANGA AONGOZA KIKAO NJOMBE.

Posted on: January 22nd, 2025

Timu ya wataalamu kutoka Ofisi ya Mkuu wa Mkoa wa Njombe, ikiongozwa na Mganga Mkuu wa Mkoa, Dkt. Juma Mfanga, pamoja na wawakilishi wa UNICEF wakiongozwa na Bi. Ruth Nkurlu, Mtaalamu wa Lishe wa UNICEF, tarehe 22 Januari, 2025 wamekutana kujadili maandalizi ya uzinduzi wa Mpango Harakishi wa Kupunguza Udumavu kwa watoto wenye umri chini ya miaka mitano (Stunting Reduction Acceleration Response Plan).

Mpango huu unalenga kupunguza kiwango cha udumavu kwa watoto, ambao kwa mujibu wa Takwimu za  utafiti wa Afya, Demografia na viashiria vya Malaria Tanzania (TDHS) za mwaka 2022, unaonesha kuwa asilimia 50.4 ya watoto chini ya miaka mitano wamedumaa.

Katika kikao hicho, viongozi walisisitiza umuhimu wa kuongeza uelewa wa jamii kuhusu lishe bora na kuhamasisha matumizi ya vyakula vyenye virutubishi muhimu kwa familia.

Dkt. Mfanga alieleza kuwa mpango huu utajumuisha afua mbalimbali za kuimarisha afya na lishe ya watoto.

Bi. Nkurlu aliongeza kuwa UNICEF itaendelea kutoa msaada wa kiufundi katika utekelezaji wa mpango huu, ili kuhakikisha watoto wanapata lishe bora na huduma muhimu za afya kwa maendeleo yao.

Uzinduzi rasmi wa " Njombe Region Stunting Reduction Acceleration Response Plan" unatarajiwa kuhusisha viongozi wa Serikali, wadau mbalimbali na wananchi kwa ujumla.