TAASISI ZA SERIKALI ZATAKIWA KUENDANA NA TEKNOLOJIA YA KISASA KATIKA MAONESHO YA NANENANE.

Posted on: August 6th, 2025

 Agosti 5, 2025 Mkuu wa Mkoa wa Njombe, Mhe. Anthony Mtaka, amezitaka taasisi za serikali zinazoshiriki maonesho ya Nanenane kuhakikisha zinakuwa na ubunifu wa teknolojia ya kisasa, ili kuendana na mabadiliko ya sayansi.

Akizungumza alipokuwa akitembelea mabanda ya maonesho hayo katika viwanja vya John Mwakangale, jijini Mbeya, Mhe. Mtaka alisema kuna haja ya taasisi sa serikaki kuachana na mazoea ya kuonesha vitu vya kizamani ambavyo havina tija kwa mkulima wa sasa.

"Taasisi za serikali zinapaswa kutoka kwenye mtazamo wa zamani na kuja kwa kisasa, tunahitaji kuona zikiwasilisha suluhisho la ubunifu na teknolojia zinazoendana na wakati huu  nasio  kurudia kila mwaka yale yale," alisema Mhe. Mtaka Mkuu wa Mkoa Njombe.

Aidha Mhe. Mtaka meongeza kuwa ni muhimu kwa taasisi hizo kuzingatia sera zinazolingana na Dira ya Taifa ya Maendeleo ya 2050, ili kuhakikisha mchango wao unaendana na mwelekeo wa kitaifa wa kukuza uchumi wa kilimo, viwanda na teknolojia huku akizitaka taasisi zinazowasilisha zana na teknolojia za kilimo katika maonesho ya Nanenane kuhakikisha zinafanya tathmini sahihi ya maeneo husika kabla ya kupeleka teknolojia hizo.

 "Hatuwezi kupeleka teknolojia ya umwagiliaji wa matone sehemu yenye mvua nyingi au kupeleka trekta kubwa eneo la kilimo cha bustani ya familia. Tunahitaji uhalisia," alisisitiza Mhe. Mtaka

Maonesho ya Nanenane mwaka huu 2025 yameenda kwa kaulimbiu “chagua viongozi bora kwa maendeleo endelevu ya kilimo, mifugo na uvuvi 2025.”