NJOMBE YAADHIMISHA MIAKA 63 YA UHURU KWA USAFI NA UPANDAJI MITI.

Posted on: December 9th, 2024

Katibu Tawala wa Mkoa wa Njombe, Bi. Judica Omari, leo tarehe 09 Desemba 2024, ameongoza mamia ya wananchi wa mkoa wa Njombe kushiriki katika maadhimisho ya miaka 63 ya Uhuru. Shughuli hizo zimefanyika kwa kusisitiza umuhimu wa utunzaji wa mazingira, ambapo usafi wa mazingira, upandaji wa miti ya matanda, na mazoezi ya viungo vilikuwa miongoni mwa mambo yaliyotekelezwa.

Akizungumza wakati wa shughuli hizo, Bi. Judica Omari alisema: "Uhuru wetu una maana kubwa zaidi tunaposhiriki kulinda mazingira na afya zetu. Ni jukumu letu kuhakikisha tunawaachia vizazi vijavyo mazingira safi na endelevu."

Bi. Judica aliongeza kuwa shughuli hizo ni sehemu ya mshikamano wa kitaifa na upendo wa nchi, akiwahimiza wananchi waendelee kushiriki kikamilifu katika maendeleo ya kijamii na kiuchumi.

Kauli mbiu ya maadhimisho ya mwaka huu ni: "Uhuru Wetu, Wajibu Wetu: Kujenga Taifa Endelevu na Shirikishi."

Wananchi waliohudhuria walionyesha mshikamano mkubwa, huku wengine wakipongeza juhudi za serikali katika kuboresha maisha ya kila Mtanzania. Mazoezi ya viungo yalifanyika kwa kushirikiana na wataalamu wa afya wa mkoa, huku upandaji wa miti ukisisitizwa kama njia mojawapo ya kukabiliana na mabadiliko ya tabianchi.

Maadhimisho haya yamehitimishwa kwa wito wa umoja na mshikamano wa kitaifa, huku wananchi wakiahidi kuendeleza juhudi za kulinda mazingira na kudumisha amani.