VIJANA 61 WANUFAIKA NA MAFUNZO YA TEKNOLOJIA ZA KILIMO KUPITIA MRADI WA YEFFA -MECHANIZATION.

Posted on: January 23rd, 2025

Ilembula, Njombe – Mradi wa YEFFA (Mechanization) Chini ya AGRA unaotekelezwa na TAPBDS, umewezesha vijana kupata mafunzo maalumu kuhusu usimamizi wa zana za kilimo, ubunifu wa teknolojia za kilimo, pamoja na kuwaunganisha na wasambazaji wa teknolojia hizo.

Mafunzo hayo yamefanyika  tarehe 21 Januari 2025 katika karakana ya mbunifu Antony Chaula huko Ilembula, yakihusisha jumla ya vijana 61, wakiwemo wanawake 15. Kupitia mafunzo haya, vijana wanapata ujuzi wa kutengeneza na kutumia teknolojia za kisasa za kilimo, hatua inayolenga kuboresha sekta ya kilimo kwa kuongeza tija na ufanisi.

Katika kundi hilo, vijana 20 wataendelea kupokea mafunzo ya ufundi kutoka kwa mbunifu Antony, hatua inayolenga kuwawezesha kujiajiri na kupunguza changamoto za upatikanaji wa teknolojia za kilimo katika maeneo mbalimbali nchini.

Mradi wa YEFFA unasimamiwa na AGRA kwa ufadhili wa  Mastercard Foundation, ukilenga kuinua kilimo kupitia matumizi ya teknolojia bunifu, huku ukiwapatia vijana nafasi ya kuendeleza ujuzi wao na kujipatia ajira endelevu