Mwekezaji Aomba Eneo kwa Ajili ya Kiwanda cha Kuchakata Mafuta ya Parachichi Njombe

Posted on: January 29th, 2025

Njombe, 29 Januari 2025 – Mwekezaji kutoka Elworld Agro & Organic Foods Ltd, Bw. Parakh Gupta, amefika ofisini kwa Mkuu wa Mkoa wa Njombe na kusaini kitabu cha wageni, ambapo alipokelewa na Mhe. Anthony Mtaka, Mkuu wa Mkoa wa Njombe.

Katika mazungumzo yao, Bw. Gupta alimweleza Mhe. Mtaka kuwa ujio wake unalenga kutafuta fursa za uwekezaji katika kilimo cha kisasa na maendeleo ya miundombinu. Alisisitiza kuwa Elworld Agro & Organic Foods Ltd inaangazia zaidi kilimo hai (organic farming).

Aidha, Bw. Gupta aliomba kupatiwa eneo kwa ajili ya ujenzi wa kiwanda cha kuchakata mafuta yatokanayo na parachichi pamoja na ekari zaidi ya 200 kwa ajili ya kilimo cha parachichi. Alibainisha kuwa uwekezaji wake utawapatia wakulima wa parachichi soko la uhakika nchini Tanzania na India.

Pia, aliahidi kuwa kampuni yake itawawezesha wakulima kwa kuwapatia vifaa vya kisasa vya kurahisisha uandaaji wa mashamba ya parachichi, ikiwa ni pamoja na miundombinu ya umwagiliaji ili kuongeza uzalishaji na kuboresha ubora wa mazao.

"Ni heshima kubwa kwetu kukutana na Mkuu wa Mkoa kwa ajili ya majadiliano na uwasilishaji wa wazo letu la kuwekeza katika maboresho ya miundombinu ya mkoa wa Njombe," alisema Gupta.

Ujio wa mwekezaji huyo unaashiria fursa ya ushirikiano kati ya sekta binafsi na Serikali katika kukuza kilimo na kuboresha miundombinu mkoani Njombe, hatua ambayo inaweza kuwanufaisha wakulima na jamii kwa ujumla.