MAZISHI YA BABA MZAZI WA MHE. DKT. FESTO DUGANGE YAFANYIKA WANGING'OMBE.

Posted on: October 15th, 2024

Naibu Waziri wa Ofisi ya Rais - TAMISEMI (Elimu), Mhe. Zainab Katimba, amefika mkoani Njombe leo tarehe 15 Oktoba 2024, kushiriki mazishi ya baba mzazi wa Naibu Waziri wa OR-TAMISEMI (Afya), Mhe. Dkt. Festo Dugange. Mhe. Katimba amehudhuria mazishi haya kwa niaba ya Waziri wa Nchi, Ofisi ya Rais - TAMISEMI, Mhe. Mohamed Mchengerwa.

Mazishi hayo yamefanyika katika kijiji cha Wanging’ombe na yamehudhuriwa na viongozi mbalimbali, akiwemo Mkuu wa Mkoa wa Njombe, Mhe. Anthony Mtaka, pamoja na Manaibu Mawaziri, Wabunge, Wakuu wa Mikoa, akiwemo Mkuu wa Mkoa wa Songwe, Mhe. Daniel Chongolo, Mkuu wa Mkoa wa Dodoma, Mhe. Rosemary Senyamulena, na Mkuu wa Wilaya ya Wanging'ombe, Mhe. Zakaria Saili Mwansasu. Viongozi wa Chama Cha Mapinduzi (CCM) mkoani Njombe, wakiongozwa na Mwenyekiti wa CCM Mkoa huo, Mhe. Deo Sanga, pia wameshiriki mazishi hayo, wakitoa pole na kuungana na familia katika kipindi hiki cha majonzi.

Katika hotuba yake ya faraja, Mhe. Zainab Katimba alisema, "Tunatambua ukubwa wa pigo hili kwa familia ya Mhe. Dkt. Festo Dugange na wote walioguswa, lakini tunaamini kuwa Mwenyezi Mungu atawapa nguvu, faraja, na moyo wa uvumilivu. Hakika tupo pamoja nanyi katika kipindi hiki kigumu, na tunawapa pole nyingi kwa msiba huu mkubwa."

Mkuu wa Mkoa wa Njombe, Mhe. Anthony Mtaka, naye alitoa salamu za pole kwa Mhe. Dkt. Dugange na familia yake, akisema, "Kwa niaba ya Serikali ya Mkoa wa Njombe, tunatoa salamu za pole kwa familia ya Mhe. Dkt. Festo Dugange kwa msiba huu mzito. Tunamuombea Mwenyezi Mungu awape amani na nguvu katika kipindi hiki cha majonzi, na kumuweka marehemu mahali pema peponi."