Katibu Tawala wa Mkoa Aongoza Uzinduzi wa Wiki ya Sheria Njombe.

Posted on: January 25th, 2025

Njombe – Katibu Tawala wa Mkoa wa Njombe, Bi. Judica Omary, ameongoza zoezi la uzinduzi wa Wiki ya Sheria kwa mwaka 2025, lililofanyika Januari 25, 2025, katika viwanja vya stendi ya zamani ya mabasi mjini Njombe.

Uzinduzi huo umetanguliwa na matembezi ya hiari yaliyowashirikisha wananchi, wadau wa sheria, wanafunzi, pamoja na viongozi wa serikali kutoka ngazi mbalimbali. Matembezi hayo yamelenga kuhamasisha jamii kuhusu umuhimu wa utawala wa sheria na upatikanaji wa haki kwa wote.

Akizungumza katika uzinduzi huo, Bi. Judica Omary amesisitiza umuhimu wa wananchi kushiriki kikamilifu katika masuala ya kisheria ili kufahamu haki na wajibu wao. Aidha, amewapongeza wadau wa sekta ya sheria kwa juhudi zao katika kuhakikisha huduma za kisheria zinawafikia wananchi kwa urahisi.

"Wiki ya Sheria ni fursa muhimu kwa wananchi kupata elimu ya kisheria, kujua haki zao na namna ya kuzitetea. Natoa wito kwa wananchi wote wa Mkoa wa Njombe kutumia fursa hii ili kufahamu masuala mbalimbali yahusuyo sheria," alisema Bi. Omary.

Katika uzinduzi huo, wananchi walipata nafasi ya kupata msaada wa kisheria kutoka kwa wanasheria na mawakili waliokuwepo, huku wataalamu wa sheria wakitoa elimu kuhusu umuhimu wa utatuzi wa migogoro kwa njia ya sheria na matumizi ya mabaraza ya usuluhishi.

Wiki ya Sheria ni maadhimisho ya kila mwaka yanayoandaliwa na Mahakama ya Tanzania kwa kushirikiana na wadau wa sekta ya sheria, ikiwa na lengo la kuelimisha umma kuhusu haki zao na kuwahamasisha kushiriki katika mifumo ya utoaji wa haki. Maadhimisho haya yataendelea kwa shughuli mbalimbali zikiwemo semina, mijadala na utoaji wa msaada wa kisheria kwa wananchi.