KATIBU TAWALA AZINDUA BODI YA USHAURI YA HOSPITALI YA RUFAA.

Posted on: January 25th, 2025

Njombe, Tanzania – Katibu Tawala wa Mkoa wa Njombe, Bi. Judica Omari, amemwakilisha Mkuu wa Mkoa, Mhe. Anthony Mtaka, katika uzinduzi wa Bodi ya Ushauri ya Hospitali ya Rufaa ya Mkoa wa Njombe, hafla iliyofanyika Januari 23, 2025.

Bodi hiyo, yenye jumla ya wajumbe tisa, imepewa jukumu la kuleta mapinduzi katika sekta ya afya mkoani humo kwa kipindi cha miaka mitatu. Akizungumza wakati wa uzinduzi huo, Bi. Judica amesisitiza umuhimu wa Bodi kuhakikisha usimamizi bora wa huduma za afya, kuibua miradi ya maendeleo, na kushirikiana na uongozi wa hospitali katika utekelezaji wa mipango mbalimbali.

Mwenyekiti wa Bodi, Balozi Danford Mpumilwa, ameahidi kuwa chombo hicho kitakuwa kichocheo cha maendeleo makubwa kwa kipindi chao cha utumishi. “Tuwajibike na kuifanya hospitali hii kuwa ya mfano hapa nchini kwa mawazo chanya yatakayosaidia katika ujenzi wa taasisi hii,” alisema.

Kwa upande wake, Mganga Mfawidhi wa hospitali hiyo, Gilbert Kwesi, ambaye pia ni Katibu wa Bodi, amesema ushirikiano kati ya wajumbe na uongozi wa hospitali utakuwa nguzo muhimu katika kufanikisha malengo ya taasisi hiyo.

Mganga Mkuu wa Mkoa wa Njombe, Juma Mfanga, ametumia fursa hiyo kuitaka Bodi kuunga mkono juhudi za kupambana na udumavu mkoani humo. Wajumbe wa Bodi, walioteuliwa na Waziri wa Afya, Mhe. Jenista Mhagama, wameshapatiwa mafunzo maalum kuhusu majukumu yao na ushirikiano unaotakiwa na timu za uendeshaji wa huduma za afya katika ngazi mbalimbali.

Mafunzo hayo yalihusisha muktadha wa kihistoria wa sekta ya afya kabla na baada ya uhuru, muundo wa uendeshaji wa Hospitali ya Rufaa ya Mkoa, na wajibu wa Bodi katika kusimamia maendeleo ya hospitali hiyo.