Hotuba ya Msimamizi wa Uchaguzi wa Halmashauri ya Wilaya ya Ludewa Ndg. Sunday Deogratias alipokutana na Viongozi wa Dini, Vyama vya Kisiasa, Wazee Maarufu, Watumishi na wananchi kutoa Maelekezo ya Uchaguzi

Posted on: September 27th, 2024

Mahali: Ukumbi Mdogo wa Mikutano wa Halmashauri ya Wilaya ya LudewaTarehe: 26 Septemmba 2024

Ndugu Waandishi wa Habari,Waheshimiwa Viongozi wa Dini,Waheshimiwa Viongozi wa Siasa,Ndugu wananchi wa Wilaya ya Ludewa,Mabibi na Mabwana,

Asanteni sana kwa kujitokeza kwenye kikao hiki muhimu kinachohusiana na maandalizi ya uchaguzi wa Serikali za Mitaa. Tunakutana hapa leo tukiwa na lengo la kuhakikisha kuwa uchaguzi huu unakuwa wa amani, haki, na unaleta matokeo yanayoakisi matakwa ya wananchi wetu.

Uchaguzi wa Serikali za Mitaa ni fursa muhimu kwa wananchi kushiriki moja kwa moja katika maamuzi ya maendeleo ya wilaya na taifa kwa ujumla. Serikali za Mitaa ndizo zinazosimamia huduma za msingi kama vile afya, elimu, maji, na miundombinu. Ni muhimu kwa viongozi watakaochaguliwa kuwa na dira na maono ya kuendeleza huduma hizi na kuboresha maisha ya wananchi wa Ludewa.

1. Umuhimu wa Ushiriki wa WananchiNingependa kutoa wito kwa wananchi wote wa Ludewa kushiriki kikamilifu katika uchaguzi huu utakaofanyika tarehe 27 Novemba, 2024. Serikali yetu imeweka mazingira rafiki na kuhakikisha kuwa kila raia anapata haki yake ya kupiga kura kwa mujibu wa Kanuni za Uchaguzi wa Mwenyekiti, Wajumbe wa Halmashauri ya Kijiji na wenyeviti wa vitongoji za mwaka 2024. Ni haki ya msingi ya kila mwananchi kujitokeza kwa wingi na kushiriki katika kuamua nani atakayewaongoza kwenye ngazi za serikali za mitaa.

Kila mwananchi mwenye sifa za kupiga kura anatakiwa kutumia haki yake hiyo ya kupiga kura na vigezo vya wapiga kura waliojiandikisha.

2. Amani na Utulivu Kabla, Wakati, na Baada ya UchaguziViongozi wa dini, viongozi wa siasa, na vyombo vya habari, mna jukumu kubwa katika kuhakikisha kuwa tunadumisha amani kabla, wakati, na baada ya uchaguzi huu. Mna ushawishi mkubwa kwa wananchi na wafuasi wenu, hivyo ni muhimu kutoa ujumbe wa kujenga mshikamano, umoja, na kuepuka uchochezi wa aina yoyote.

Tunawataka wagombea wote na wafuasi wao kuhakikisha kuwa kampeni zitaendeshwa kwa sheria na kanuni zilizopo. Kila mtu ana jukumu la kuhakikisha kuwa sheria hizi zinaheshimiwa ili kuepuka vurugu na kuendeleza amani.

Nawaomba viongozi wa dini kuendelea kuhubiri amani na ushirikiano miongoni mwa wananchi. Waandishi wa habari, ninyi ni sauti ya umma, naomba muendelee kuripoti kwa haki, ukweli, na bila upendeleo. Viongozi wa kisiasa, muwe mfano bora kwa kuepuka maneno ya uchochezi na badala yake muwaongoze wafuasi wenu kwa busara na hekima.

3. Maandalizi ya UchaguziNinafuraha kuwafahamisha kuwa maandalizi ya uchaguzi huu yanaendelea vizuri. Serikali imeweka mikakati thabiti kuhakikisha kuwa vifaa vya uchaguzi vinawafikia wapiga kura kwa wakati na mchakato mzima unafanyika kwa uwazi na ufanisi. Kila kitu kiko tayari kuhakikisha wananchi wanapiga kura kwa utaratibu na salama.

Sote kwa pamoja tunalo jukumu la kuhakikisha kuwa mchakato mzima wa uchaguzi unafanyika kwa uwazi na kwa mujibu wa sheria. Hivyo, wananchi wasiwe na wasiwasi kuhusu haki na usawa wa uchaguzi huu.

Ninawahakikishia kuwa sisi kama Halmashauri tutatekeleza wajibu wetu kwa mujibu wa sheria, kuhakikisha uchaguzi unakuwa huru, wa haki, na unaendeshwa kwa misingi ya uwazi na usawa. Hivyo basi, naomba tushirikiane kuhakikisha mchakato huu unafanikiwa.

4. Mwito wa UshirikianoNapenda kumalizia kwa kutoa mwito wa ushirikiano. Waandishi wa habari, viongozi wa dini, na viongozi wa siasa, tuendelee kushirikiana kwa karibu kuhakikisha uchaguzi huu unafanikiwa. Pamoja, tunaweza kudumisha amani, umoja, na mshikamano ili wilaya yetu ya Ludewa iendelee kuwa mfano wa kuigwa katika mchakato wa kidemokrasia nchini.

Ndugu zangu, uchaguzi ni sehemu ya maendeleo, na tusiruhusu tofauti zetu za kisiasa ziharibu amani na utulivu wetu. Amani ni nguzo ya maendeleo, na uchaguzi ni fursa ya kuboresha maisha yetu.

Asanteni kwa kunisikiliza, na nawatakia maandalizi mema ya uchaguzi wa Serikali za Mitaa.

Ahsanteni Sana.