BODI YA USAJILI WA WAHANDISI YAFANYA ZIARA MKOA WA NJOMBE.

Posted on: December 2nd, 2024

Leo asubuhi, tarehe 2 Desemba 2024, Bodi ya Usajili wa Wahandisi (ERB) ikiongozwa na Mwenyekiti wake, Eng. Elizabeth Sway, imefanya ziara ya kikazi katika Ofisi ya Mkuu wa Mkoa wa Njombe. Wahandisi hao walipata fursa ya kusaini kitabu cha wageni na kupokelewa rasmi na Mkuu wa Mkoa wa Njombe, Mhe. Anthony Mtaka.

Katika mazungumzo yao, Eng. Sway alimueleza Mhe. Mtaka kuwa ziara yao mkoani Njombe inalenga kutembelea shule za sekondari na kuhamasisha wanafunzi kusoma masomo ya sayansi. Juhudi hizo zinafanyika kupitia Mradi wa Student Support Program (SSP), unaolenga kuwajengea wanafunzi uelewa na shauku ya kuchagua taaluma za kihandisi na fani nyingine za kisayansi.

Mhe. Mtaka aliipongeza Bodi ya Usajili wa Wahandisi kwa jitihada hizo muhimu za kuinua elimu ya sayansi mkoani Njombe. Alisisitiza ushirikiano wa karibu kati ya serikali ya mkoa na ERB katika kuhakikisha wanafunzi wanapata motisha ya kusoma masomo ya sayansi kwa maendeleo ya taifa.